Северанс эмнэлгийн эмч нар хиймэл зүрхний насосны дэмжлэгтэйгээр 86 настай, өндөр эрсдэлтэй өвчтөний титэм судасны ажилбарыг амжилттай хийснээ 1-ний өдөр мэдээллээ.
Есдүгээр сарын 14-нд Северанс эмнэлгийн Зүрх судасны тасгийн профессор Ан Чоль Мин, И Сан Хёб нарын баг 86 настай, Ким овогтой эрэгтэйн биед бичил хэмжээтэй хиймэл зүрхний насос ‘Impella’ суулгасны дараа титэм судасны ажилбар хийжээ. Кимийн титэм судас нарийссан тул цусны урсгалын шинэ зам гаргах мэс засал хийлгэж, улмаар хиймэл хавхлагыг судсаар оруулан суулгадаг ‘судсан хүрцээр аортын хавхлага суулгах ажилбар (TAVI)’ хийлгэсэн байв.
Тухайн үед Кимийн зүрхний үйл ажиллагаа муудаж, кардиоген шоконд орох, нас барах эрсдэл өндөр байжээ. Титэм судсыг буюу зүрхийг хүчилтөрөгч, шим тэжээлээр хангадаг чухал судсыг тэлэх шаардлагатай байсан ч ийм ажилбар хийх нь хэт эрсдэлтэй байв. Тэрээр өмнө нь зүрхний хэд хэдэн мэс засал хийлгэсэн, мөн өндөр настай учраас судсанд кальци хуримтлагдан, цусны хангамж доголдох магадлал өндөр байсан юм.
Иймээс эмч нар ажилбарын үеэр цусны эргэлтийг тогтвортой байлгахын тулд эхлээд Impella хиймэл зүрхний насос суулгажээ. Impella нь гуяны артериар дамжуулан нарийн насосыг зүрхэнд оруулдаг төхөөрөмж юм. Уг төхөөрөмж зүүн ховдол дахь цусыг сорж, аорт руу шууд шахсанаар зүрхний гүйцэтгэх ёстой шахуургын үүргийг орлодог. Ингэснээр шокийн үед ч амин чухал эрхтнүүдэд очих цусны урсгалыг зохих түвшинд хадгалах боломжтой.
Impella ашигласны дараа эмч нар титэм судсанд кальци хуримтлагдсанаас үүссэн эмгэг голомтыг амжилттай арилгажээ. Кимийг эрчимт эмчилгээний тасагт ажигласны дараа ажилбарын маргааш ердийн тасагт шилжүүлсэн байна. Тэрээр бие нь сэргэсний дараа эмнэлгээс гарчээ.
Северанс эмнэлгийн мэдээлснээр Кимд хийсэн ажилбар нь БНСУ-д Impella ашигласан тохиолдлуудаас TAVI хийлгэсэн өвчтөнд өндөр эрсдэлтэй титэм судасны интервенц хийсэн цорын ганц тохиолдол юм. Өмнө нь зүрхний мэс засал болон аортын хавхлагын ажилбар хоёуланг нь хийлгэсэн өндөр эрсдэлтэй өвчтөнд эмчилгээний шинэ сонголт бий болгосноороо онцгой ач холбогдолтой гэж эмч нар үзэж байна.
Профессор Ан Чоль Мин “Энэ өвчтөний зүрхний үйл ажиллагаа, титэм судасны байдал зэрэг хүчин зүйлийг харгалзан үзэхэд ажилбарын явцад цусны даралт болон биеийн нийт цусны эргэлт тогтворгүй болох эрсдэл маш өндөр байсан” гээд “Impella ашиглан зүрхний ачааллыг бууруулж, цусны эргэлтийг хадгалсны ачаар ажилбарыг аюулгүй дуусгаж чадсан” гэж хэлэв.
Профессор Им Сан Хёб “Цаашид ч өвчтөний биеийн байдлыг нарийн үнэлж, зохистой бөгөөд аюулгүй эмчилгээний тогтолцоог бүрдүүлнэ” гэж мэдэгдэв.
