Поп од Жастин Биберийн хуучин найз бүсгүй, Австралийн нэртэй загвар өмсөгч Сахара Рэй 34 насандаа таалал төгсжээ. Түүнийг мансууруулах үйлчилгээтэй өвчин намдаах эм болох фентанил хэтрүүлэн хэрэглэсний улмаас нас барсан гэж таамаглаж байна.
Орон нутгийн цагаар 19-нд Daily Mail болон гадаадын томоохон хэвлэлүүдийн мэдээлснээр, Рэй синтетик опиоидын төрлийн мансууруулах үйлчилгээтэй өвчин намдаах эм болох фентанилыг хэтрүүлэн хэрэглэсний улмаас 16-нд Лос-Анжелесийн нэгэн эмнэлэгт яаралтай хүргэгджээ. Үүнээс хойш амьсгал дэмжих аппаратаар амьдралыг нь тэтгэж байсан ч гэр бүлийнхнийх нь шийдвэрээр 18-нд аппаратыг салгасан гэж дотоод эх сурвалж мэдээлэв. Нас барсан албан ёсны шалтгааныг одоогоор зарлаагүй байна.
Рэй өнгөрсөн нэгдүгээр сард охин Сноу Рэй Доугаа төрүүлснээс ердөө есөн сарын дараа нас баржээ. Тэрбээр өнгөрсөн дөрөвдүгээр сард охинтойгоо хамт цагийг өнгөрүүлж буй бичлэгээ нийтэлж, хүүхдээ олон нийтэд харуулж байсан юм.
Алдарт серфингчин Тони Рэйн охин Рэй загвар өмсөхийн зэрэгцээ хувцас загварын чиглэлээр ажиллаж, нэрд гарсан. Тэрбээр өөрийн усны хувцасны брэндийг гаргаж, нөлөөлөгчийн хувьд ч ихээхэн алдаршжээ. Улмаар 2016 онд Жастин Бибертэй үерхэж байгаа гэх мэдээллээр дэлхий нийтийн анхаарлыг татсан юм.
Рэйн ээж Гретчен Бах орон нутгийн хэвлэлд илгээсэн мэдэгдэлдээ «Сахара гэр бүл, хувцас загвар, серфинг, хамгийн гол нь бага насны охин Сноудаа хайртай, хүсэл тэмүүлэлтэй, сайхан сэтгэлтэй залуу эмэгтэй байсан» хэмээгээд, «Охиныг минь хайрлаж дэмжсэн шүтэн бишрэгчид болон дэлхийн өнцөг булан бүрээс гүн эмгэнэл илэрхийлж буй хүмүүст талархаж байна» гэж мэдэгджээ.
Рэй сүүлийн үед эрүүл мэндийн ноцтой асуудалтай тэмцэж байв. Тэрбээр 2024 оны дөрөвдүгээр сард гэнэтийн зам тээврийн осолд орсныхоо дараа Гийен-Баррегийн хам шинж (Guillain-Barré syndrome) хэмээх аутоиммуны ховор өвчнөөр оношлогдсоноо мэдээлсэн. Тухайн үед TikTok-д нийтэлсэн бичлэгтээ «Гуяны дээд хэсгээс хөлийн хуруу хүртэл мэдээгүй болж, огт алхаж чадахгүй болсон» хэмээн тайлбарлаж, тэргэнцэр хэрэглэхээс өөр аргагүй болсноо өөрөө ярьсан юм.
Гийен-Баррегийн хам шинж нь дархлааны тогтолцоо мэдрэлийн систем, ялангуяа захын мэдрэлийн тогтолцоог довтолж гэмтээдэг цочмог үрэвсэлт өвчин юм. Ихэвчлэн хөнгөн хэлбэрийн халдварт өвчнөөр өвчилсний дараа үлдэц мэт илэрдэг бөгөөд хөлийн хуруунаас эхэлсэн саажилт хөлөөр дамжин их бие, гар руу аажмаар өгсдөг онцлогтой.
Гийен-Баррегийн хам шинжтэй ихэнх өвчтөний мэдрэлийн үйл ажиллагаа өвчин эхэлснээс хойш зургаан сараас гурван жилийн хугацаанд аажмаар сэргэдэг бөгөөд нийт өвчтөний ойролцоогоор 85 хувь нь зургаан сарын дотор бие даан алхах хэмжээнд хүртэл сайжирдаг гэж үздэг.
